జఘనమండలము హంసయాన కురులు

సాహితీమిత్రులారా!

ఈ చ్యుతదత్తచిత్రపద్యం చూడండి-

ఈ పద్యంలో ఒక స్త్రీని వర్ణించాడు కవి

అధరముఖవర్ణ సూన్యంబు లతివకుచము

లాన నాకారరహిత, మబ్జాక్షి మేను

అజ జఘనమండలము, హంసయానకురులు

చరమ భాన్వితకరము చానతొడలు

ఈ పద్యంలో కవి స్త్రీని ఏ విధంగా వర్ణించాడో చూడండి-

ఆమె ఎలాంటి స్త్రీ అంటే

అ - లోపించిన అధరములు - కుచములు

ఆ - లేని ఆననము - మేను

జ - లేని జఘనము - కురులు

భ - కారముతోడి కరములు -  తొడలు - గలది  ఆమె.

అంటే 

అధరములో 

అ తీసివేస్తే ధరము - కొండ

కొండలవంటి కుచములు గలది ఆవిడ

ఆననము -లో ఆ తీసివేయగా

ననము అవుతుంది. ననము అంటే తీగ

తీగవంటి శరీరంగలది ఆమె.

జఘనము లో జ- లేనటువంటిది

అంటే జ తీసివేయగా ఘనము - మేఘము

మేఘమండలము వంటి కురులు గలది ఆవిడ

భాన్విత కరములు అంటే భతో కూడిన కరములు

కరభములు - అరటిబోదెలవంటి తొడలు గలది ఆసుందరాంగి.