తలుపు తట్టువాడెవ్వడు?
సాహితీమిత్రులారా!
లీలాశుకుని శ్రీకృష్ణకర్ణామృతంలోని
ఈ సంవాద చిత్రం చూడండి-
గోపిక - కృష్ణులసంవాదం ఇది చూడండి-
అఙ్గుళ్యా కః కవాటం ప్రహరతి?
కుటిలే మాధవః,
కింవసన్తో?
నో చక్రి,
కిం కులాలో?
నహి ధరణిధరః,
కింద్విజిహ్వః ఫణీన్ద్రః?
నాహం ఘోరాహిమర్ధీ
కిమసి ఖగపతి?
ర్నో హరిః
కిం కపీన్ద్రః?
ఇత్యేవం గోపకన్యా
ప్రతివచనజితః
పాతు వ శ్చక్రపాణిః
గోపిక - అంగుళ్యా కః కవాటం ప్రహరతి?
(ఎవ్వడు వ్రేళ్ళతో తలుపు తడుతున్నది)
కృష్ణుడు - కుటిలే మాధవః
(వంకరగా ఆలోచించేదానా మాధవుడను)
గోపిక - వసంతః కిం?
(వసంతుడవా ఏమి)
కృ - నో చక్రీ (కాదు, చక్రముకలవాడను)
గో- కిం కులాలః?
(ఓహో కుండలు చేసే కుమ్మరివా)
కృ - నహి ధరణిధరః
(కాదు సమస్త భూమిని ధరించినవాడను)
గో- కిం ద్విజిహ్వః ఫణీన్ద్రః?
(అట్లా నిజం చెప్పు, ఓహో భూభారం మోసే
రెండునాల్కలుగల ఆదిశేషునివా)
కృ - నాహం, ఘోరాహిమర్ధీ
(అబ్బేకాదు, నేను ఆకళింగ సర్పాన్ని మర్దన చేసినవాడను)
గో - కిమసి ఖగపతిః?
(ఓహో అదా సంగతి. పాములను పట్టి తినే పక్షీంద్రునివా)
కృ - నో హరిః ?
(కాదు, నేను హరిని)
గో- కిం కపీంద్రః?
(అయితే పెద్దకోతివి అన్నమాట)
ఇత్యేవం గోపకన్యాప్రతివచనజితః పాతు వ శ్చక్రపాణిః
ఈవిధంగా గోపిక యొక్క బదులుమాటలచేత ఓడిపోయిన
చక్రపాణి(కృష్ణుడు) మమ్ము రక్షించుగాక
ఇందులో మాధవుడు - విష్ణువు, వసంతుడు
చక్రి - చక్రమును ధరించువాడు
(విష్ణువు, కుమ్మరివాడు)
ధరణిధరుడు - భూమిని ధరించినవాడు
(విష్ణువు, ఆదిశేషుడు)
అహిమర్ధి - పాములను మదించువాడు
(కాళీయమర్దనుడు, గరుత్మంతుడు)
హరి - విష్ణువు, కోతి
ఈ విధంగా శ్లేషార్థాలు ఉండటంవల్ల
సంవాదం రసవత్తరంగా సాగింది.
No comments:
Post a Comment