బ్రహ్మాండాంతసంవర్ధియై (పేరడీ)

బ్రహ్మాండాంతసంవర్ధియై (పేరడీ)

సాహితీమిత్రులారా!

పోతన భాగవతంలో వామనుడు పెరిగిన విధం తెలిపే పద్యం ఇది.

ఇంతితై, వటుఁడింతయై, మఱియుఁదానింతై, నంభోవీధిపై
నంతై, తోయదమండలాగ్రమున కల్లంతై, ప్రభారాశిపై
నంతై, చంద్రుని కంతయై, ధ్రువునిపై నంతై, మహర్వాటిపై
నంతై, సత్యపదోన్నతుం డగుచు బ్రహ్మాండాంతసంవర్ధియై
              (శ్రీమదాంధ్రమహాభాగవతము - 8- 622)

దీనికి  పాయల సత్యనారాయణగారి పేరడీ చూడండి. వామనావస్థలో ఉన్న స్త్రీలు
త్రివిక్రమునిగా పెరిగారని తెలుపుతూ వ్రాసిన పద్యం.(ఆంధ్రజ్యోతి వారపత్రిక 15-1-1988)

ఇంతింతై వధువింతయై, గృహమునందింతై, స్వయంవీధిలో 
నంతై, గ్రామసభా విభాగమున కల్లంతై, స్వతాలూకపై
నంతై, మండలమంతయై, మరియు తానాంధ్ర ప్రదేశమ్ముపై
నంతై, భారతదేశమంతయయి బ్రహ్మాండాంతసంవర్ధియై

రవిబింబంబుపమింపఁబాత్రమగు ఛత్రంబై, శిరోరత్నమై
శ్రవణాలంకృతియై గళాభరణమై సౌవర్ణకేయూరమై
ఛవిమత్కంకణమై కటిస్థలి నుదంచద్ఘట్టమై నూపుర
ప్రవరంబై పదపీఠమై వటుఁడు దాబ్రహ్మాండమున్ నిండుచోన్
                                                  (శ్రీమదాంధ్రమహాభాగవతము - 8- 623)
దీనికి పేరడీ

మగరాయుండుపమింప భర్తయయి, క్శేమంబెన్ను నేస్తమై
సగమై పాన్పుకు రాత్రికే హితుడునై సామాన్యమౌ నౌకరై
వగలాడై నిజపాదదాసుడయి, అవ్యాజమ్ముగ బానిసై
పగవాడై నడపీనుగై, మహిళతా బ్రహ్మాండమున్ నిండుచోన్