అంతలోననే అగును గజాననుండు
సాహితీమిత్రులారా!
ఇది ఒక ప్రహేలిక లేక పొడుపుకథ ఇందులోని విషయాన్నంతా చదివి
ఆలోచించి సమాధానం చెప్పాలి దీనికే విచ్చుడుకత అని అంటారు.
చూడండి మరి.....
నగతనయన్ అరన్ సిరిని నాలుగు వర్ణములన్ లిఖించి, పొందుగ నొక యక్షరంబు తుద దూకొని నిల్పిన యంతలోననేయగును, గజాననుండు, మరియందొక యొక్కొక్క యక్షరంబు, డించగను, చతుర్ముఖుండు, శరజన్ముడు, పంచశరుండు వహ్నియున్
దీని సమాధానం - "ఉమాకుమార"
నగతనయన్ - పర్వతరాజ పుత్రిక అయిన ఉమ(పార్వతి),
ధరన్ - భూమి అర్థాన్నిచ్చే కు ను,
సిరిని - లక్ష్మిని తెలిపే మా ను,
ఈనాలుగు వర్ణాలను వరుసగా రాసి,
చివర మరొక అక్షరాన్ని, దూకొని - అంగీకరించి,
చేర్చినంతలో
ఉమాకుమార అవుతుంది -
దీన్నుండి గజాననుండు - వినాయకుడు వస్తాడు.
మరలా వరుసగా ఒక్కొక అక్షరాన్ని,
డించగ - తగ్గిచగా ఉమాకుమార లో "ఉ" తొలగిస్తే - మాకుమార -
అంటే లక్ష్మీకుమారుడు - చతుర్ముఖుడు - బ్రహ్మ,
అలాగే మాకుమార నుండి "మా" తొలగిస్తే కుమార - అంటే శరజన్ముడు - కుమారస్వామి,
అలాగే కుమారలో "కు" తొలగిస్తే
మిగిలింది "మార" అంటే పంచశరుడు(మన్మథుడు),
దీనినుండి "మా" తొలగించిన మిగిలేది "ర".
ర అంటే వహ్ని (అగ్ని) వరుసగా వస్తాయి.
దీనికి ప్రహేలిక అనే కాకుండా దీన్ని "చ్యుతచిత్రం"గా కూడా చెప్పవచ్చు.
No comments:
Post a Comment